Haath Pakra Hai To Taa Hashr Nibhaana Yaa Ghawth

Huzoor Raees Al Qalam Allama Arshadul Qadiri Alayhirrahmah Kalaam In The Baargaah Of Huzur Ghawth E Azam Radi Allahu Anhu.

Haath Pakra Hai To Taa Hashr Nibhaana Yaa Ghawth,
Abb Kissi Haal Main Daaman Na Churaana Yaa Ghawth.

Tere Naana Ki Sakhaawat Ki Qassam Hay Tujhko,
Apnay Darr Se Mujhay Khaali Na Phiraana Yaa Ghawth.

Apnay Hi Koochay Main Sar Shaar E Tamanna Rakhna,
Apnay Mohtaaj Ko Darr Darr Na Phiraana Yaa Ghawth.

Tere Jalwon Se Hain Kitnay Hi Shabistaan Roshan,
Mere Dil Main Bhi Koi Shamma' Jalaana Yaa Ghawth.

Aasteen Apni Barhaana Meri Aankhon Ki Taraf,
Yaad Main Apni Mujhay Jab Bhi Rulaana Yaa Ghawth.

Dil Se Utray Na Kabhi Tere Tasawwur Ka Khumaar,
Aisaa Aik Jaam Mahabbat Ka Pilaaana Yaa Ghawth.

Dost Khush Hoon, Mere Dushman Ko Pashemaani Ho,
Kaam Bigray Huay Iss Tarah Banaana Yaa Ghawth.

Koi Chingaari Sulagti Rahe Dil Main Har Damm,
Ishq Ki Aanch Main Iss Tarah Jalaana Yaa Ghawth.

Kabhi Aankhon Kabhi Khaana E Dil Main Rehnaa,
Rooh Bann Kar Meri Ragg Ragg Main Samaana Yaa Ghawth..